Subling natala sa Philippine Statistics Authority (PSA) ang pagkunhod sa inflation o ang paglihok sa presyo sa mga palaliton ug serbisyo sa nasud sa buwan sa Abril.
Matod ni PSA National Statistician ug Undersecretary Dennis Mapa, niabot sa 1.4 porsiyento ang inflation niadtong Abril, mas hinay kay sa 1.8% nga inflation niadtong Marso, ug 3.8% sa miaging tuig.
Tungod niini, ang kasagaran nga inflation sa nasud gikan sa Enero hangtod Abril anaa sa 2.0%.
Gipasabot sa PSA nga tungod kini sa hinay nga paglihok sa presyo sa mga pagkaon ug non-alcoholic beverages lakip na ang bugas, utanon, ug galunggong.
Gani, ang rice inflation natala sa -10.9% niadtong Abril gikan sa -7.7% niadtong Marso.
Nakatampo usab sa paghinay sa inflation rate mao ang hinay nga pagsaka sa presyo sa gasolina ug diesel.
Sa laing bahin, nipaspas ang inflation sa NCR ngadto sa 2.4% niadtong Abril tungod sa pagsaka sa singil sa kuryente.
