Patay ang usa ka gidudahang miyembro sa New People’s Army (NPA) samtang usa ka sundalo ang samdan sa engkwentro nga nahitabo sa Barangay Humay-humay, niadtong buntag sa Mayo 1, 2025.
Matod ni Police Lt. Jerome de Lara, deputy chief sa Guihulngan City Police Station, nga nakit-an ang lawas sa lalaki nga rebelde atol sa gipahigayong clearing operation human sa pagbinayloay og bala.
Narekober usab sa lugar nga nahitaboan ang usa ka M16 rifle, mga bala, personal nga mga butang, ug mga dokumento.
Daling gidala sa tambalanan ang naangol nga sakop sa Philippine Army.
Tungod sa insidente, temporaryong mibakwit ang pipila ka mga residente sa mas luwas nga mga dapit.
Ang City Social Welfare and Development Office (CSWDO) nagpadayon sa pagtino sa gidaghanon sa mga apektadong pamilya.
