Gitawag sa Malacañang nga fake news ang nagkatag nga memorandum nga giingong gikan sa Office of the President nga gipirmahan ni Executive Secretary Lucas Bersamin, nga giingong nagpalagpot kang House Speaker Martin Romualdez.
Matud pa nga tungod sa pagkunhod sa ratings ni Presidente Ferdinand Marcos Jr., gikinahanglan nga palig-unon pa ang mga hinabang sa gobyerno alang sa katawhan.
Matod ni Palace Press Officer USec. Claire Castro, dili angay seryosohon ang nasangpit nga report tungod kay tataw nga adunay nagpakatag niini sa tuyo nga pakauwawan ang gobyerno ug pipila ka mga opisyal.
Nanawagan si Castro sa katawhan nga dili na lang motuo sa mga dokumento nga ilang makita ilabi na sa social media kay uso na karon ang mga pekeng dokumento.
Ang pamahayag ni Castro gumikan sa mikatag nga memorandum kalabot sa post-meeting report sa giingong Laylo survey presentation niadtong Abril 8, 2025, nga giingong gitambongan ni Presidente Ferdinand Marcos Jr. ug ubang opisyal sa gobyerno.
