Nagpahigayon og tigom ang mga opisyal sa Malacañang Press Corps Inc. (MPC) ug ang Presidential Communications Office (PCO) kagahapon , Abril 28, aron hisgutan ang mga polisiya sa akreditasyon sa media.
Sa partikular, giingong adunay mga obserbasyon nga posibleng limitahan ang awtonomiya sa mga newsroom sa pagpili sa mga tigbalita nga itudlo sa beat.
Una nang gikataho nga ang Presidential Communications Office (PCO) nipahibawo sa ilang pagdili sa mga peryodista nga gitugotan sa pag-cover sa mga kalihokan ni Presidente Ferdinand Marcos Jr.
Sumala sa pahayag sa MPC, lakip sa mga isyu nga ilang gitumbok mao ang lima ka tuig nga minimum nga kinahanglanon alang sa mga entidad sa media ug ang mga kondisyon alang sa coverage sa gobyerno alang sa mga tigbalita.
Giingon nila nga kini nga lakang mahimo’g makaapekto sa kahimtang sa mga bag-ong organisasyon sa balita ug pag-deploy sa mga batan-ong kawani.
Gihatagan usab nila og gibug-aton ang panginahanglan sa pagpatin-aw sa mga termino sama sa “bakak nga pagreport”, nga usa sa mga hinungdan sa pagkansela sa akreditasyon, aron masiguro nga dili kini basta-basta gamiton.
Gikatahong bukas ang mga opisyal sa PCO sa mga sugyot sa MPC apan ilang giinsister nga gikinahanglan ang mas estrikto nga mga polisiya tungod sa kamahinungdanon sa beat sa Malacañang.
Ang duha ka habig nagkasabot nga magtinabangay sa pagpangita og solusyon nga makaseguro sa kaepektibo ug awtonomiya sa mga tigbalita.
Gihangyo usab sa PCO nga magsumite ang MPC og position paper, ug gikasabotan usab nga i-postpone ang pagsumite sa accreditation requirements gikan Abril 29 ngadto sa Mayo 2.
Ang MPC, sa iyang bahin, mipasalig nga kini magpadayon sa pagpalambo sa kaayohan sa iyang mga miyembro, pagsuporta sa pagpalig-on sa self-regulation sa media, ug mobarug alang sa gawasnon, kritikal, ug etikal nga journalism..
