Miabot na ang 25 miyembro sa Philippine Inter-agency Humanitarian Contingent sa Mandalay para mutabang sa pagpangita sa upat ka nawala nga Pilipino nga gituohan nga na-trap sa nahugno nga Sky Villa Condominium human miigo ang 7.7-magnitude nga linog sa Myanmar kaniadtong Marso 28.
Sa ulahing situation report gikan sa Office of the Civil Defense, gibutyag niini nga lakip sa gideploy ang gikan sa Urban Search and Rescue team (USAR), Defense and Armed Forces attaches (DAFA), Contingent Commander, og Liaison Officer.
Human aprubahan ang ilang deployment, mibyahe ang grupo sakay sa 45-seater bus og miabot sa ILBC International School, IGCSE, Mandalay.
Motabang sila sa mga opisyal sa Embahada sa Pilipinas sa Yangon og National Bureau of Investigation team nga una ng nag-adto sa Mandalay para pangitaon ang upat ka nawala nga Pilipino.
