Gipaniguro sa Department of Migrant Workers nga magpadayon ang ilang operasyon sa pagpasira sa mga illegal travel agencies sa nasud.
Kadaghanan kanila nalambigit sa illegal recruitment sa mga Pinoy nga gustong motrabaho sa gawas sa nasud. Niining bahina, malampuson nga gipasira sa ahensya ang usa ka ahensya sa pagbiyahe nga nagtanyag trabaho sa nasud sa Bulgaria.
Kining maong lakang sa ahensya pinasikad sa direktiba ni Presidente Ferdinand Marcos Jr. nga maseguro nga maprotektahan ang tanang OFW batok sa mga sindikato.
Sumala sa DMW, ang gisira nga Yatra Travel & Tours sa New Barrio Pampanga, San Fernando City ilegal nga nagtanyag ug trabaho sa Bulgaria bugti sa taas nga suholan.
Ang binuwan nga tanyag nga suweldo gikan sa ₱90,000 hangtod ₱110,000.
Ang maong travel agency giingong nangayo og ₱400,000 ngadto sa ₱500,000 matag recruit alang sa processing fee samtang ₱50,000 alang sa downpayment.
Ang mga ngalan sa mga personalidad sa luyo sa Yatra Travel gi-blacklist usab.
