Human matangtang sa katungdanan, ang kanhi Presidente sa South Korea nga si Yoon Suk Yeol magpadayon nga makadawat og proteksyon gikan sa Presidential Security Service (PSS).
Base sa Presidential Security Act, hatagan siya ug ang iyang asawa og seguridad sulod sa lima ka tuig sukad siya natangtang sa katungdanan sa dili pa matapos ang iyang termino.
Lakip sa mga probisyon sa seguridad sa kanhi Presidente mao ang pagpatrolya sa palibot sa iyang balay, ug proteksyon bisan kanus-a sila mobiyahe, kung gikinahanglan.
Si Yoon, kinsa nanumpa isip presidente niadtong Mayo 2022, gitangtang sa katungdanan niadtong Biyernes human gisuportahan sa korte sa konstitusyon ang impeachment sa National Assembly sa iyang deklarasyon sa martial law niadtong Disyembre sa miaging tuig.
Sa pagkakaron nag-atubang usab siya og separadong kasong kriminal tungod sa rebelyon.
