Miduyog si Presidente Ferdinand Marcos Jr. sa pagsaulog sa International Women’s Day karong adlawa. Matod sa presidente, angayan lang nga ilhon ang mga babaye nga kabahin sa kusog nga puwersa nga nagpalig-on, nagkugi, ug naghatag og bag-ong porma sa katilingban.
Gibutyag sa Pangulo nga ang mga babaye adunay dakong papel sa paghulma sa kasaysayan sa Pilipinas.
Gikan sa Katipunan ug mga gerilyang Pilipino hangtod sa pagkahimon nga frontliners ug propesyonal nga mga lider sa ilang tagsa-tagsa ka natad, gipakita sa mga babaye ang ilang kahibalo, talento, ug bisan ang ilang kinabuhi alang sa kaayohan sa kadaghanan.
Kalabot niini, gipasalig sa presidente nga protektahan kanunay sa gobyerno ang katungod sa kababayen-an ug pakigbatokan ang bisan unsang hulga nga makababag sa ilang kalamboan.
Samtang giila usab ni Vice President Sara Duterte ang kalig-on og dakong kontribusyon sa katilingban sa mga kababainhan karong International Women’s Day og National Women’s Month.
Gibutyag sa bise presidente ang makaalarma nga human trafficking sa mga kababainhan ug bata nga nagpabiling bahad sa seguridad og dignidad sa daghang kababainhan.
Nanawagan si VP Sara og hiniusang paningkamot para mapakusog ang mga balaud nga mag-hunong sa pagpanlupig sa mga kababainhan.
