Mopasaka og bag-ong diplomatic protest ang gobyerno sa Pilipinas kalabotan sa ‘unprofessional og reckless flight maneuvers’ sa helicopter sa PLA-Navy Harbin Z-9 nga may ‘tail number 68’ nga milupad sa duol nga distansiya nga tres metros lamang gikan sa Cessna 208B Grand Caravan EX sa BFAR samtang nagpahigayon og regular maritime domain awareness flight sa Bajo de Masinloc, Martes, Pebrero 18.
Sa usa ka pahayag gikan sa National Maritime Council, gibutyag sa konseho nga hilabihan nga naalarma ang gobyerno sa Pilipinas sa nahimong aksiyon sa Chinese helicopter.
Ang maong direktang delikadong aksiyon ang nagbutang sa mga piloto og pasahero nga sakay niini sa delikadong sitwasyon.
Nagpakita usab matod pa kini og kawad-on og pagrespito sa mga patakaran nga ginadawat sa tibuok kalibutan para sa ‘good airmanship’ og flight safety.
Gihingusgan usab sa konseho nga adunay dili malimod nga soberanya og hurisdiksyon ang Pilipinas sa Bajo de Masinloc.
