Unom ka tawo ang namatay sa sunog nga niulbo sa usa ka resort construction site sa Busan City, South Korea kagahapon, Pebrero 14.
Base sa gipagawas nga report sa Busan Gijang District Fire Department, nagsugod ang sunog alas 10:20 sa buntag (9:20 sa Pilipinas) ug nidugay pa og pipila ka oras una kini ns fire out sa mga bombero.
Moabot sa 100 ka mga trabahante ang pugos nga gipabakwit gikan sa nasunogan samtang 14 ka mga tawo ang kinahanglang i-rescue gamit ang helicopter tungod nakorner sila sa ibabaw sa building nga nasunog.
Human mahurot ang kalayo, ang mga bombero ug mga rescuer misulod sa building ug nakit-an ang unom ka mga tawo nga wala nay panimuot.
Gidala pa sila sa tambalanan apan gideklara nga patay na.
Gawas sa unom nga namatay, 25 ka mga tawo ang gikataho nga nasamdan.
Samtang, atol sa kataas sa rescue ug firefighting operation sa nasangpit nga sunog, si SoKor acting president Choi Sang-mok nimando nga ipakatap ang tanang bakanteng personnel ug mga ekipo aron malikayan nga mograbe ang sunog ug mapalong kini sa hingpit.
Padayon pa ang imbestigasyon sa kabomberohan sa tinubdan sa sunog lakip na niini ang pagpaniid sa tibuok building.
