Giawhag ni Presidente Ferdinand Marcos Jr ang mga sundalo nga magpabiling nakatutok sa ilang misyon bisan pa sa kagubot ug kasaba sa palibot ilabina sa isyu sa politika.
Si PBBM mihimo sa maong pamahayag human mibisita sa Southern Luzon Command (SOLCOM) sa Camp General Guillermo Nakar sa Quezon province .
Gipahinumdoman sa Presidente nga ang trabaho sa mga sundalo nga mao ang pagpabilin sa kalinaw ug pagpanalipod sa katawhan.
Samtang ang misyon sa Presidente mao ang pagpanindot sa Pilipinas ug dili ang away sa walay pulos nga mga butang.
Gihatagan og gibug-aton sa Presidente nga ang matag usa adunay managsama nga misyon ug kini mao ang pagpanalipod sa katawhan ug sa Republika sa Pilipinas.
Nipasalig usab si PBBM sa mga sundalo sa hingpit nga suporta sa administrasyon ngadto sa AFP, PNP, ug tanang empleyado ubos sa SOLCOM.
Gipasalamatan usab ni Pangulong Marcos ang mga sundalo sa ilahang dedikasyon ug serbisyo kung asa gidasig usab sila sa pagpadayon sa ilang maayong trabaho alang sa mas luwas ug mas progresibong Pilipinas. Gipasiugda ni Presidente Marcos Jr. ang panginahanglan sa panaghiusa.
Kini aron masiguro ang kalinaw, seguridad, ug kaluwasan sa katawhan ug teritoryo sa Pilipinas.Gidayig usab sa Presidente ang talagsaong kontribusyon sa mga sundalo, ilabina ang ilang paspas ug epektibong pagtubag sa unom ka sunodsunod nga bagyo nga miigo sa nasod sulod lang sa baynte tres ka adlaw.
Gitataw pa ni Presidente Marcos nga tungod sa maayong trabaho sa mga otoridad, giila karon ang Pilipinas nga eksperto sa pagtubag sa kalamidad.
Matod niya, nagpakita usab kini nga bisan pa sa limitado nga mga kahinguhaan, ang nasud mahimong molampos batok sa mga hagit sa kinaiyahan.
