Gikumpirma sa Philippine National Police-Criminal Investigation and Detection Group (PNP-CIDG) nga gihuptan na nila karon ang usa ka Pilipino nga nalambigit sa binilyon ka pesos investment scam nga unang nadakpan sa Indonesia.
Kahinumdoman nga nadakpan kini sa maong nasod sa pakig-alayon sa CIDG og sa Indonesian Police sa Bali.
Sa usa ka pahayag, giila ni CIDG Director, PBGen. Nicolas Torre III ang suspek nga si Hector Pantollana.
Ang nahisgotan may giatubang nga patong-patong nga kaso sa nasod ug may warrant of arrest alang sa kasong syndicated estafa og swindling.
Nadakpan sa mga otoridad si Pantollana samtang pasakay unta sa usa ka flight nga paingon sa Hong Kong.
Aduna usab kini Red Notice gikan sa International Police alang sa kasong may kalabotan sa paglapas sa Republic Act (RA) 8799 o Securities Regulation Code.
