Naga plano ang pipila ka mga Senador nga pagadugangan ang budget sa Office of the Vice President (OVP).
Base sa una nga giaprobahan sa House of Representatives, ang budget sa OVP alang sa 2025 mokabat sa P733 milyones.
Hinuon si Senador Joel Villanueva niingon nga ilang gitan-aw ang posibilidad nga madugangan ang maong budget.
Matod ni Villanueva, upat ngadto sa lima ka mga miyembro sa Senado ang iyang gikaestorya ug silang tanan nipadayag sa ilang tinguha nga madugangan ang pundo sa OVP.
Gitataw sa Senador nga dili makiangayon ang kapin sa katunga sa pundo sa OVP nga natangtang ilabi na nga ang maong buhatan maoy ikaduhang labing taas sa nasud.
Matod sa Senado, P100 milyones hangtod P150 milyones ang ilang gitan-aw nga dugang pundo alang sa maong buhatan.
Bisan pa niini, ang Senador niingon nga kon unsa man ang desisyon sa Kongreso bahin sa OVP fund, iya kining respetuhon.
