Daling gidala sa Philippine Heart Center niadtong Biyernes, Nobyembre 8, 2024 ang founder sa Kingdom of Jesus Christ (KOJC) nga si Apollo Quiboloy .
Matod ni Philippine National Police Public Information Office (PNP PIO) Chief PBGen. Jean Fajardo, nadala sa tambalanan si Quiboloy human makasinati og panakit sa dughan ug dili regular nga pagpitik sa kasingkasing.
Matod niya nga niadtong Nobiyembre 7, si Quiboloy nireklamo sa paghuot sa dughan hinungdan nga gipaubos dayon kini sa medical examination sa PNP General Hospital.
Sa pagsusi nasuta nga si Quiboloy adunay iregular nga heartbeat nga maisip nga makahulga sa kinabuhi.
Matod ni Fajardo, gitugotan sa korte nga masusi si Quiboloy sa Philippine Heart Center diin gikatakdang ibalik si Quiboloy sa PNP custodial facility.
Matod niya nga nakadawat og email ang PNP gikan sa Pasig RTC nga naghangyo nga lugwayan ang medical furlough ni Quiboloy hangtod sa alas singko sa hapon sa Nobyembre 16 aron mahuman ang tanan niyang medical examination.
Si Quiboloy gitanggong sa PNP Custodial Center sa Camp Crame ug nag-atubang og kasong sexual abuse ug non-bailable qualified human trafficking.
