Nag-issue ug subpoena ang House Good Government and Public Accountability Committee sa unom ka mga opisyal sa Office of the Vice President human nga wala sila motunga sa mga deliberasyon sa komitiba kalabot sa imbestigasyon sa pondo sa maong buhatan.
Lakip kanila mao sila si chief-of-staff Zuleika Lopez, Atty. Lemuel Ortonio, Atty. Rosalynne Sanchez, Gina Acosta, Julieta Villadelrey, ug Edward Fajarda.
Mihimo usab og mosyon si Committee chairman Manila Rep. Joel Chua sa pag-isyu ug Immigration Lookout Bulletin Order batok sa nahisgutang 6 ka opisyal sa OVP.
Dinhi, gimandoan sa mga opisyal ang imigrasyon nga mag alerto kung mosulay sa pagbiya sa nasud ang mga nahisgutan.
Agig tubag, nagpadala ug position paper ang OVP nga gipirmahan sa 19 ka mga opisyal niini. Sumala kanila, ang maong mga pagpangutana sa House panel ang dili na alang sa gitawag nga “in aid of legislation”.
Gipahayag usab nga ang maong deliberasyon o pagdungog dili na kinahanglan, busa dili na usab kinahanglan ang pagtambong sa mga opisyal ug personahe sa OVP.
Nangatarungan usab sila nga mitambong sa deliberasyon si VP Sara sa House Committee on Appropriations kaniadtong Agosto 27 aron hisgutan ang gisugyot nga pondo sa OVP alang sa 2025.
Gikadugang pa nga gisaway usab sa OVP ang kakulang sa mas tin-aw nga katuyoan sa lehislatibo o sa lehislasyon nga gilauman nga maoy resulta sa mga deliberasyon.
Gikutlo usab sa mga opisyal sa OVP ang hukom sa Korte Suprema nga dili pugson ang mga resource person sa bisan unsang congressional hearing ug mahimong makabalibad.
