Giduso sa human rights lawyer og kanhi Bayan Muna Rep. Neri Colmenares kang President Ferdinand Marcos Jr. nga ipasa sa International Criminal Court (ICC)ang sworn statements nilang retired police Col. Royina Garma og self-confessed drug lord Kerwin Espinosa.
Kini human sa mga giyagyag sa quad committee sa Kamara kalabot sa extrajudicial killings nga nahitabo sa gipatuman ang drug war ni kanhi Presidente Rodrigo Duterte.
Sumala kang Colmenares nga usa sa mga abogado sa pipila ka mga kaso sa mga biktima sa extrajudicial killings, ang mga testimoniya ang nakitaan og “systematic pattern” sa pag-abuso sa tawhanong katungod.
Angayan sumala kang Colmenares nga ipakita ni Marcos nga wala gina-tolerate sa iyang administrasyon ang impunity.
Kun mapasa ang sworn statement nilang Garma og Espinosa sa international court sumala pa sa natungdan, mas mapabakod pa niini ang prosecution kang Duterte og kanhi Philippine National Police (PNP) Chief og karon Senador Ronald ‘Bato’ Dela Rosa.
Kahinumduman nga si Garma nga giingong paborito nga pulis ni Duterte og nagsilbi usab kaniadto sa Davao City ang nagkumpirma nga adunay reward system sa police officers nga nalambigit sa pagpatay sa drug suspects.
Giilog kini sumala kaniya sa “Davao model” kun asa gikan ang reward sa P20,000 hangtud sa P1 million sa matag adunay mapatay nga drug suspect depende usab sa ilang klasipikasyon.
Sa statement usab ni Espinosa, gibutyag niini nga si Dela Rosa ang nagmando kaniya nga iduot si kanhi Senador Leila de Lima sa illegal drug trade isip kabahin sa political demolition.
Abril 2022 dihang gibawi ni Espinosa ang iyang mga statement batok kang De Lima og gibutyag nga wala kini sala tungod resulta lamang kini sa pressure, pag-pressure, intimidasyon, og mga bahad kaniya og sa iyang pamilya sa maong higayon.
Mitubag usab si Senator Bato dela Rosa nga wala siyay kahibalo sa ginasulti ni Garma nga “reward system” sa pagpatay sa drug suspects ilawom sa Duterte administration.
Gibutyag usab ni Bato nga wala siya nagatuo sa maong sistema tungod ang gipanumpaan nga katungdanan sa pulis sumala kaniya nga ipabilin nga drug-free ang lugar nga ilang ginaserbisyohan.
