Tama ang nahimong desisyon ni Pangulong Ferdinand “Bongbong” Marcos Jr.nga ipasirado ang mga Philippine Offshore Gaming Operators (POGO), nga giingong adunay koneksyon sa mga sindikato sa iligal nga droga, og mga kaso sa extrajudicial killings, nga nagsilbi nga bahad sa seguridad og kalinaw sa nasud, sumala kang Deputy Speaker David “Jayjay” Suarez.
Sa pagdungog sa Quad Committee sa Kamara de Representantes, migawas matod pa nga adunay usa ka halapad nga sindikato nga matod pa gipangunahan sa kanhi Presidential adviser ni Pangulong Rodrigo Roa Duterte nga si Michael Yang kauban ang negosyanteng si Allan Lim.
Ang maong sindikato ang nalambigit sa nagkadaiyang kriminal nga gimbuhaton gikan sa pagpayuhot og droga, money laundering, hangtod sa pagpadagan sa mga iligal nga POGO nga ginahimo nga kakunsabo ang mga korap nga opisyal sa gobyerno.
Sa pagdungog, parehong gipresenta nilang Suarez og Senior Deputy Speaker Aurelio “Dong” Gonzales Jr. ang usa ka detalyadong matrix nga nagpakita kung paunsa gidumalahan nilang Yang og Lim, kauban ang ilang mga kaubang Chinese, ang nagpaluyo sa usa ka halapad nga criminal network.
Dugang pa ni Suarez, nadiskubrehan sa mga pagdungog ang mas lalom nga relasyon sa operasyon sa POGO sa mga kriminal nga gimbuhaton nga nagpaluyo sa lehitimong gaming operations, kaylap ang mga iligal nga aktibidad sama sa human trafficking, money laundering, og mga krimen nga adunay kalabotan sa droga.
Gihingusgan usab sa magbabalaud ang makaalarma nga pagdaghan sa mga extrajudicial killings nga konektado sa iligal nga industriya sa POGO.
Gidugang pa niya nga bisan nga adunay mga lakang nga ginahimo ang gobyerno aron ipasirado ang mga operasyon sa POGO, dili angayang muhunong ang pakigbatok sa naasoy nga mga iligal nga aktibidad.
Nanawagan usab si Suarez alang sa mas hugot nga pagpatuman sa balaud og mga reporma sa polisiya aron kapugngan ang pagbalik sa mga susamang matang sa operasyon sa giatubang.
Gipasalamatan usab ni Suarez ang ginahimong imbestigasyon sa Quad Comm, nga adunay dakong tabang sa pagdiskubre sa lalom nga problema.
