Posibleng ma-disqualify si ex-Bamban Mayor Alice Guo sa iyang mayoralty bid, gawas lang kon makakuha siya og temporary restraining order (TRO).
Kini maoy gipahibalo sa Commission on Elections (Comelec).
Matod sa Comelec, dawaton gihapon nila ang certificate of candidacy ni kanhi Bamban Mayor Alice Guo.
Si Comelec Chairman George Garcia niingon nga dunay sukaranan ang pag-disqualify.
Lakip sa gitumbok nga basehanan sa disqualification mao ang pagdeklara nga nuisance candidate, petisyon nga nagtinguha nga kanselahon ang COC tungod sa edad ug citizenship, ug ang desisyon sa Ombudman nga nagpahamtang og perpetual disqualification gikan sa paghupot og pampublikong katungdanan.
Ang tigpamaba sa Comelec nga si John Rex Laudiangco sa sayo pa niingon nga walay gahom ang poll body nga awtomatik nga kanselahon ang COC ni Guo tungod kay nagsalig sila sa desisyon sa Ombudsman.
Niadtong Biyernes, si Stephen David, ang legal counsel ni Guo, niingon nga ang gitaktak nga mayor sa Bamban moduso sa iyang COC karong Martes, ang kataposang adlaw sa pag-file sa Mayo 2025 midterm elections.Si Guo nag-atubang og kasong graft, qualified human trafficking, money laundering, ug tax evasion tungod sa giingong pagkalambigit niini sa Philippines Offshore Gaming Operator (POGO) hub sa iyang lungsod.
Kasamtangang gitanggong si Guo sa Pasig City Jail.
Si Guo gitaktak sa iyang katungdanan isip mayor sa Bamban niadtong Agosto. Ang Department of Foreign Affairs nikanselar sa Philippine passport kay ang iyang biometrics nitakdo sa Chinese passport holder nga si Guo Hua Ping base sa files sa National Bureau of Investigation (NBI).
