Misentro ang isyu sa nagkagrabeng krisis sa Middle East sa una ug kataposang US Vice Presidential debate tali ni Democrat Tim Walz ug Republican JD Vance karong Martes, Oktubre 1 (oras sa Amerika).
Gipangutana ang duha ka VP candidates kung suportahan ba nila o supakon ang pre-emptive strike sa Israel batok sa Iran, nga giisip sa US nga labing dako nga state’s sponsor sa terorismo sa kalibutan ug adunay kapasidad sa paghimo og mga nuclear weapons sa usa o duha ka semana.
Unang mitubag si Minnesota Gov. Walz, running mate ni VP Kamala Harris, diin iyang gitumbok nga ang America kinahanglang adunay presensya sa Middle East.
Gihisgotan usab ni Walz ang masaker niadtong Oktubre 7 sa amihanang Israel diin iyang giinsister ang panginahanglan nga adunay makanunayon nga liderato ug matud niya nakita niya kini ubos sa pagpangulo ni VP Kamala Harris.
Sa habig ni Ohio Sen. Vance, running mate ni ex-Pres. Donald Trump, siya nagbutyag nga ang desisyon nagdepende sa Israel kung gusto nila nga maglusad og preemptive strike sa Iran human sa paglusad niini sa mga missile sa Israel niadtong Martes.
Gawas niini, nagbinayloay usab og mga panglantaw ang duha kalabot sa isyu sa climate change taliwala sa paghapak sa Hurricane Helene sa Amerika.
Matod ni Vance, ang kadaot human sa bagyo usa ka dili katuohan nga dili matukib nga trahedya sa tawo bisan kung wala siya direktang tubag sa pangutana nga adunay kalabotan sa epekto sa pagbag-o sa klima.
Gipasiugda ni Walz ang mga kalamboan nga gihimo ni VP Harris sa pagbag-o sa klima ug gisaway ang miaging komento ni Donald Trump nga ang isyu usa lamang ka “limbong”.
Pipila pa sa mga isyu nga gihisgutan sa duha mao ang mga isyu sa ekonomiya sa Amerika ug immigration policies.
