Gipaminusan ni Senate President Francis “Chiz” Escudero ang Philippine Health Insurance Corporation (PhilHealth) sa mandatory nga kontribusyon sa mga miyembro tungod sa kadako sa pundo nga wala magamit nga mibulusok sa paglabay sa panahon.
Gamit ang datus gikan sa Department of Finance, si Escudero niingon nga ang reserbang pundo sa PhilHealth niabot na og kapin sa P500 bilyones dugang pa sa dakong subsidy sa gobyerno matag tuig.
Matod ni Escudero, adunay igong resources ang ahensya aron makunhuran ang premium nga kontribusyon sa miyembro.
Ang gobyerno naggahin ug tinuig nga subsidy sa PhilHealth alang sa pagpatuman sa National Health Insurance Program, nag-una sa pagtabon sa mga premium sa dili direkta nga mga kontribyutor lakip na ang mga kabus ug senior citizens.
Niadtong 2021, niabot og P71.3 bilyones ang subsidy sa PhilHealth nga niulbop og P80 bilyones niadtong 2022, P79 bilyones niadtong 2023 ug sa pagkakaron, niabot na sa P40.3 bilyones.
Matod niya, kon ang tinuig nga subsidy sa PhilHealth adunay aberids nga P70 bilyones, magamit unta kini sa gobyerno sa paggahin sa ubang panginahanglanon nga makuha sa state insurance company gikan sa kaugalingong reserbang pundo.
Gitataw ni Escudero nga ang PhilHealth nawad-an og P20 bilyones matag tuig sa kantidad sa pundo nga wala magamit o gipalit lang sa National Treasury nga moabot og P500 bilyones isip reserve fund.
Giaprobahan sa Senado ang usa ka balaodnon nga nagtinguha sa pag-amendar sa Republic Act 11223 o ang Universal Health Care (UHC) Act aron paubsan ang premium rate sa mga direct contributor sa PhilHealth.
Ang susamang sugyot nga nagtinguha sa pag-amendar sa UHC Act kay pending na karon sa Balay. Adbokasiya usab ni Escudero nga adunay kausaban sa case rates base sa kantidad sa kontribusyon nga gibayad sa miyembro.
