Hingpit nang gipermahan ni Presidente Ferdinand Bongbong Marcos Jr. ang Republic Act No. 12022 o ang Anti-Agricultural Economic Sabotage Act kagahapong adlawa.
Tumong sa bag-ong balaod mao ang pagpalig-on sa sektor sa agrikultura sa nasud, pinaagi sa pagpugong sa mga ilegal nga kalihokan nga makababag sa suplay sa pagkaon ug hinungdan sa pagsaka sa presyo sa mga batakang palaliton.
Sumala sa Presidnete nga ang nasangpit nga balaod kay usa ka proactive nga lakang aron mapugngan ang pagsulod sa mga smuggled nga produkto sa agrikultura dinhi sa Pilipinas, ug magsiguro sa hustong pagbayad sa tukmang buhis.
Ubos sa maong balaod, mas bug-at na nga silot ang ipahamtang sa mga gidudahang nalambigit sa economic sabotage sama sa smugglers ug hoarders.
Gibanabana nga mokabat sa 200 billion pesos nga kita ang nawala sa gobyerno matag tuig tungod sa economic sabotage partikular na ang smuggling.
Gidudahan usab nga economic sabotage ang hinungdan nga mitaas ang presyo sa mga palaliton ug adunay kakuwang sa mga produkto sa agrikultura.
