Niinsister ang abogado nga nagnotaryo sa counter-affidavit ni dismissed Bamban, Tarlac Mayor Alice Guo sa kasong human trafficking nga biktima siya sa nahitabo.
Kini human gihawiran sa mga Senador ang abogado atol sa pagpadayon sa hearing niadtong Martes aron pagpasabot sa counter-affidavit nga iyang ginotaryo niadtong Agosto 14 dihang wala motunga si Guo, sukwahi sa iyang pamahayag sa miaging mga hearing nga personal niyang nakita ang kanhi mayor.
Niadtong Agusto, gikataho nga nilayas na si Guo dinhi sa Pilipinas, mao nga mipatim-aw nga iyang ginotaryohan ang iyang counter-affidavit bisan og gikan pa siya sa nasod sukad niadtong Hulyo.
Sa maong hearing, gahi sab og ulo si Atty. Galicia ug gihingusgan ang iyang katungod batok sa self-incrimination sa makadaghang higayon nga gitugotan sa mga Senador ang abogado sa pagpasabot sa iyang habig human giangkon ni Alice Guo nga niadtong unang semana sa Hulyo siya mipirma sa iyang counter-affidavit.
Samtang si Senador Sherwin Gatchalian niingon nga namakak si Atty. Busa kinahanglang manubag si Galicia.
Sa samang pagdungog, gi-refer usab ni ex-Mayor Alice Guo ang abogado nga nag-andam sa draft sa iyang counter-affidavit nga si Atty. Ray Ann Co sa Gana-Atienza-Avisado law firm.
Dinhi, gipasabot ni Atty. Co nga ilang gipadala ang dokumento ngadto sa secretary ni Guo nga si Catherine Salazar niadtong Agosto 14 nga wala masayod kon asa ang kanhi mayor.
Gipahibawo usab sila nga nagdumili si Guo nga magkita og personal tungod sa hulga sa iyang kinabuhi hinungdan nga nag-communicate na lang sila pinaagi sa cellphone.
Samtang, ang katabang ni Guo niasoy nga gisugo siya sa pag-print sa draft nga gipadala sa law firm pinaagi sa messaging application (viber) ug gilakip ang signature page sa brown nga sobre nga iyang gikuha sa balay ni Guo sa Bamban, Tarlac.
