Gikompirma ni Republican ug kanhi US Vice President Dick Cheney nga mobotar siya kang Democratic presidential candidate VP Kamala Harris sa eleksyon sa Nobyembre karong tuiga.
Human kini sa pag-endorso sa iyang anak nga babaye ug kanhi Republican Representative for Wyoming nga si Liz Cheney karong semanaha.
Mahinumdoman nga si Cheney nagsilbi isip ika-46 nga ikaduhang presidente sa America ubos kang kanhi Republican President George W. Bush gikan sa 2001 hangtod 2009.
Sa usa ka pamahayag, ang kanhi Bise Presidente, nagbutyag nga walay indibidwal nga hingpit nga hulga sa Republika sa America gawas kang kanhi US President Donald Trump, nga mao karon ang pambato sa Republican Party sa eleksyon sa pagkapresidente.
Gihisgutan usab niini ang pagsulay ni Trump sa pag-hijack sa miaging eleksyon pinaagi sa paggamit sa mga bakak ug kapintasan aron magpabilin sa gahom pagkahuman gisalikway siya sa mga botante.
Mao nga dili na siya masaligan pag-usab sa pag-angkon og gahom.
Isip usa ka lungsuranon, nagbutyag si Cheney nga ang tanan adunay katungdanan nga unahon ang nasud kaysa partisanship aron depensahan ang konstitusyon, kini ang hinungdan ngano nga mobotar kang Harris.
Ang pamahayag ni kanhi VP Cheney gihangop sa kampo ni VP Harris.
Samtang, gisaway ni Trump si Cheney tungod sa iyang pamahayag ug gitawag ang kanhi Bise Presidente sa US nga walay kalabotan nga RINO nga nagpasabot nga “Republican in name only”.
Gihulagway usab ni Trump si Cheney isip “King of Endless, Nonsensical Wars” tungod sa iyang giingong papel sa gubat sa Iraq.
Gawas kang Cheney, ubay-ubay usab nga mga Republican ang nipadayag og suporta sa kandidatura ni VP Harris lakip na ang dinosenang mga kanhi opisyal ubos ni kanhi Pres. George Herbert Walker Bush ug Pres. George W. Bush.
