Gipa-deport na pabalik sa China ang 84 ka Chinese nationals gikan sa mga illegal Philippine Offshore Gaming Operators (POGOs) sa Bamban, Tarlac ug Porac, Pampanga kagahapong adlawa, Setyembre 6.
Matud kang Presidential Anti-Organized Crime Commission (PAOCC) spokesperson Dr. Winston Casio, halos katunga sa mga gipadeport nga Chinese POGO workers ang gikan Bamban, Tarlac ang gipadala sa Shanghai tungod didto matud pa atubangon ang ilang kaso samtang ang nahibilin nga nasikop gikan sa Porac, Pampanga ang maadto sa Xi’An, ang silingan sa Shaanxi Province sa central China.
Matud pa adunay kinatibuk-ang 88 Chinese nationals unta ang takda nga ipa-deport apan na-offload ang upat human mihimo ug kagubot sulod sa eroplano.
Nadiskubre usab nga ang uban nga gipadeport adunay bag-o nga preliminary hold departures nga giisyu batuk kanila.
Sa kinatibuk-an adunay 1,777 ka mga dayuhan ang napa-deport pagawas sa Pilipinas samtang 309 pa ang nagpaabot sa ilang deportasyon.
