Nagtuo si House Assistant Majority Leader Rep. Raul Angelo Bongalon nga importante ang giumol nga Quad Committee hearing aron mawagtang ang nagsapaw-sapaw nga hurisdiksyon tali sa upat ka komitiba nga kaniadto nagpahigayon og managlahing hearing sa nagkalain-laing isyu sama sa extra judicial killings (EJK), war on drugs, illegal drugs trade, ug ilang koneksyon sa Philippine offshore gaming operators (POGO).
Matod niya ang pag-umol sa maong komitiba magsilbi nga instrumento sa pagsubay ug pagtino sa kamatuoran luyo sa mga linuog nga krimen nga may kalabotan sa mga isyu nga giimbestigahan.
Matod niya importante usab ang pagpatawag sa komitiba kang kanhi presidente Rodrigo Duterte ug Senador Ronald de La Rosa.
Gipakita ni Bongalon ang usa ka kaso kung asa matod niya kinahanglan nga imbitahon ang labing takos nga saksi aron mahibal-an o makita ang kamatuoran.
Siya miingon nga ang maong mga isyu nahitabo sa dihang silang duha nag-alagad sa nasud ug sila adunay daghan nga isulti mahitungod niini.
Giklaro ni Lanao De Sur Cong. Zia Alonto Adiong nga ang sunodsunod nga mga hearing nga himuon ubos sa quad committee nakasentro sa mga naunang imbestigasyon nga nanggawas sa mga komite sa Kamara ug sa nagkadaiyang ahensya sa gobyerno.
Matod niya nga wala na siyay laing gustong makita dinhi kon dili ang kalambigitan sa mga krimen nga giimbestigar sa maong mga ahensya, base usab sa inisyal nga findings ug patchwork sa impormasyon.
Gipasiugda ni La Union Cong. ug House Asst Majority Leader Paolo Ortega nga ang pagahimuon nga imbestigasyon kay ayuda ra sa balaod.
Buot ipasabot nga makatabang kini sa paghimo og mga bayronon alang sa kaayohan sa nasud.
