Gi-assign ni Presidente Ferdinand Marcos Jr. ang Department of Public Works and Highways (DPWH) nga sugdan ang pagtukod sa Stage 2 Integrated Disaster Risk Reduction and Climate Change Adaptation Project sa Pampanga.
Ang Presidente mihimo sa maong direktiba human gi-inagurahan ang Stage 1 sa IDRR-CCA sa Masantol, Pampanga karong adlawa.
Matod sa Presidente, kinahanglang mahuman ang maong proyekto aron maibanan ang kaylap nga pagbaha nga nasinati sa mga lungsod sa Macabebe, Masantol, Minalin, Sto.Tomas ug Apalit ilabi na sa panahon sa ting-ulan.
Matod pa niya nga ang pagbuto sa bulkang Pinatubo niadtong 1991 dako og epekto sa pagsaka sa baha, diin ang abo ug lahar nakababag sa mga suba ug agianan sa tubig.
Ang Presidente nagkanayon nga sa diha nga mahuman ang nasangpit nga proyekto, ang mga residente sa Pampanga makabaton og proteksyon gikan sa pagbaha ilabi na niadtong nagpuyo sa ubos nga mga dapit.
Gibutyag usab sa Presidente nga tungod sa Stage 1 IDRR-CCA, mas paspas nga mohubas ang baha sa mga nahisgutang lugar sulod sa 17 ka adlaw gikan sa 66 ka adlaw nga giagwanta sa mga residente ang baha.
Si Presidente Marcos nagpasalamat sa gobyerno sa Korea sa pagpundo sa proyekto.
Samtang, si Ambassador of the Republic of Korea to the Philippines Lee Sang-Hwa nipasalig nga puno ang suporta sa ilang gobyerno alang sa Pilipinas ilabi na ang pagtukod og mga flood control projects sa Pampanga.
Matod niya ang nasangpit nga mga proyekto maoy dakong kaharuhay sa mga molupyo didto.
