Nahimong maayo ang imbukada sa Agusto 3 alang sa mga Pilipino sa Paris Olympics human nga midaug si Nesthy Petecio batok kang Amina Zidani sa France sa round-of-16 sa women’s 57kg weight class sa boxing.
Sulod na karon sa quarterfinals ang Pinoy pride nga Tokyo Olympics silver medalist og pananglitan magpatigbabaw pa gyud sa musunod nga round, sigurado na kini nga makadala og medalya alang sa nasud.
Apan una niini, mao kini ang mga bantayan nga atleta karong adlawa’ng Sabado.
OBIENA
Sa athletics, musabak na sa kumpetisyon si Ernest John “EJ” Obiena alas 4:10 karon sa hapon (oras sa Pilipinas).
Para kini sa men’s pole vault qualification (Group A) kung asa kinahanglan niini nga malukso ang qualification standard nga 5.80 meters ukon angayang malakip sa 12 best performers gikan sa 32 nga anaa sa kumpetisyon.
Ikaduha si Obiena sa tibuok kalibutan sa natad sa pole vault karon ug siya usab ang nagahupot sa Asian record nga 6m apan lisod usab ang tinguha alang sa gold medal mission niini tungod anaa usab sa kumpetisyon ang defending Olympic champion nga si Armand Duplantis sa Sweden nga mao usab ang world number one.
Gawas kang Duplantis nga adunay world record nga 6.23m, anaa usab ang World Number 3 nga si Sam Kendricks sa USA.
YULO
Bantayan alas 9:30 sa gabie ang potensyal usab nga medalist sa Pilipinas nga si Carlos Edriel Yulo.
Finals na kini sa Men’s Floor Exercise nga usa usab sa pet exercise ukon forte sa Pinoy pride.
Tuyo ni Yulo nga makabawi human nga anaa sa ika-12 lamang sa 24 ka gymnasts sa all-around finals sa miaging gabie.
PAALAM
Alas 9:46 unyang gabie, musaka pag-usab sa ring ang Tokyo Olympics silver medalist nga si Carlo Paalam alang sa quarterfinals sa men’s -57kg division.
Pananglitan mudaog si Paalam karong gabie, sigurado na kini nga makaangkon og bronze medal ug buhi usab ang paglaum nga malabwan niini ang iyang nakab-ot sa Olympics sa Japan kaniadtong 2021 ukon mabulsa ang gold medal alang sa Pilipinas.
Kahinumduman nga nag-abante si Paalam sa quarterfinals human gipildi ang Irish fighter nga si Jude Gallagher sa Round of 16.
Ang katibuk-ang rankings sa mga nasod sa Paris Olympics ang mahimong makit-an sa official website sa Bombo Radyo Philippines nga mao ang www.bomboradyo.com og sa official facebook page sa Bombo Radyo Gensan.
