Sunod-sunod nga nangabot ang mga delegasyon nga mosalmot sa Palarong Pambansa 2024, una ang pormal nga pagsugod sa labing
dakong sports competition sa Pilipinas.
Kaganihang alas 5:00 sa buntag nangabot sa Cebu ang mga delegado gikan sa Rehiyon 8 (Eastern Visayas Region).
Ang maong delegasyon gilangkoban sa 400 ka mga atleta, coaches, ug chaperones.
Gipaabot nga moabot karong adlawa ang ikaduhang grupo sa mga delegado gikan sa Bicol Region tungod kay ang unang grupo niabot sa dakbayan sa sugbo.
Kagahapon, niabot usab ang mga delegasyon gikan sa Zamboanga Peninsula.
Ang maong delegasyon magpabilin sa Labangon Elementary School isip billeting quarter.
Kagahapon usab miabot ang 800 ka mga atleta ug coaches gikan sa Rehiyon 10 (Northern Mindanao).
Niadtong Huwebes, Hulyo 4, unang niabot sa dakbayan ang delegasyon sa CAR. Ang maong delegasyon gilangkuban sa 700 ka mga atleta, coach, ug uban pang opisyal.
Gipaabot sa organizing committee sa Palarong Pambansa ang padayon nga pagdagsa sa mga atleta, coach, umpires, ug mga tumatan-aw sa palaro nga opisyal nga magsugod sa Hulyo 9 ug molungtad hangtod sa Hulyo 16.
