Gitun-an sa kampo ni kanhi Senador Leila De Lima ang legal nga aksyon aron patubagon ang mga nagpaluyo sa iyang pagkapriso kalabot sa kaso sa ilegal nga drugas.
Kini human usab sa pagkaabsuwelto sa kanhi Senadora sa kataposang kaso sa drugas nga gisang-at sa prosekusyon sa miaging administrasyon ubos ni kanhi Presidente Rodrigo Duterte.
Gibutyag ni De Lima nga gitan-aw sa iyang abogado ang tulubagon ni kanhi Pang. Duterte, kanhi Justice Secretary Vitaliano Aguirre, ug ubang mga tawo nga nagpaluyo sa iyang pito ka tuig nga pagkabilanggo.
Gibutyag usab ni De Lima nga dako ang iyang gibati nga kahayahay ug makaginhawa na siya og maayo human gibasura sa Muntinlupa RTC ang ikatulo ug kataposan niyang kaso sa drugas.
Kahinumdoman nga ang kanhi senador nakagawas niadtong Nobyembre 2023 human gitugotang makapiyansa human natanggong sa Camp Crame sukad niadtong Pebrero 2017.
Sa pagkakaron, gawas nga tigpamaba sa Liberal Party (LP), nagtudlo ug nagplano si De Lima nga mobalik sa legal practice.
