TAM-IS kaayo ang mga pahiyum nga gidawat sa 116 ka mga benepisaryo gikan sa Brgy. Datal Anggas, Alabel, Sarangani Province ang suhol nilang tag-P8,060.00 kagahapon sa buntag, Hunyo 20, 2024.
Kini human mi-trabaho sulod sa 20 ka adlaw ang naasoy nga mga benepisaryo pinasikad sa TUPAD program ilalum sa DOLE-12.
Subay kini sa gisangon ngadto kanilang trabaho pinaagi sa pagmugna og community works, ingon man carpentry and beautification activity didto sa eskwelahan sa Sitio Ulo Latian, sakop sa Brgy. Datal Anggas, Alabel, sigun ni Joylyn M. Enables sa Public Employment Services Office (PESO) Alabel,
Ang naasoy nga pay-out gipasi-ugda gayud sa Department of Labor and Employment (DOLE) Sarangani Field Office, Opisina ni Sarangani lone District Congressman Steve Chiongbian Solon ug Lokal nga Panggamhanan sa Alabel.
Tungod niini, nagpasalamat gayud pag-ayo ngadto sa buhatan sa DOLE Sarangani ug sa Opisina ni Congressman Solon, tungod sa mga programa ug proyekto nga gigahin aron matabangan ug mahatagan og dugang nga panginabuhian sa katawhan labi na sa mga hilit ug lagyo nga dapit sa Alabel.
