Ginakabalak-an sa Philippine Olympic Committee (POC) ang mas mubo nga tsansa sa Pilipinas nga maghakot ug gold medals sa 2025 Southeast Asian Games kung dili paminawon sa Thailand ang apela nga ibalik ang weightlifting isip usa sa mga events.
Kahibaluan nga giwala sa Thailand ang maong event nga dako unta ang potensyal nga maghatag ug gold medal alang sa Pilipinas.
Sumala kang POC president Abraham “Bambol” Tolentino, napadala na nila ang appeal sa Thailand.
Gawas sa weightlifting, gina-apela usab nga ibalik ang wushu, jiu-jitsu, ug karate, nga mao ang mga events nga nagmadaugon ang mga Filipino athletes sa milabay nga edisyon sa SEA Games.
Pahayag pa ni Tolentino, dili lamang ang Pilipinas ang nag-appeal kun dili ang mayorya sa games members sa gipahigayon nga SEA Games Federation meeting sa Bangkok sa nakalabay nga weekend.
Sumala sa chief official, anaa lamang sa 40 ka sports ang i-feature sa Thailand.
Kahinumduman nga ang nasampit nga upat ka sports ang nahimong yawe aron makatipon ang Pilipinas ug walo ka gold medals sa nauna nga edisyon sa SEA Games sa Cambodia kaniadtong 2023.
