GENERAL SANTOS CITY – Nagpaabot na lamang ug go signal ang COMELEC Gensan alang sa verification sa mga pirma nga nasumite sa kauluhan.
Matud ni Gensan City COMELEC Officer Atty. Sharmaine Garangan nga napadala na sa COMELEC Main Office niadtong Enero 15, 2024 ang mga signature sheets nga may kinatibuk-ang 48,841 nga pirma.
Sunod matud pa nga proseso ang pagpaabot ug kamandu-an gikan sa comelec central office alang sa verification sa mga pirma.
Gipaklaro ni Atty. Garangan nga dinhi ipahigayon ang verification gamit ang voters list kung asa makita ang pirma sa mga botante. Kung madawat na nila ang kamandu-an gilayon nga pahibaw-on ang proponent aron mahibaw-an ang venue ug petsa.
Nanghinaot usab kini nga dili madisturbo sa voters verification ang voters registration nga sugdan karong Pebrero 12 hangtud Septembre 30 ning tuiga.
Una nga gikumpirma sa Opisyal nga dose mil lamang ka pirma ang gikinahanglan nga mupirma sa petisyon apan milampas pa sa three percent human nakaabut ug kapin kuwarenta-mil ang mga mipirma.
