GENERAL SANTOS CITY – Nangadam na ang City Sports Division alang sa pag-abot ni Pinoy boxer Dave Apolinario sa dakbayan nga gikatakda ugmang adlawa. Sumala ni Sannie Sombrio sa City Sports Division nga nakig-alayon na sila sa buhatan sa airport sa Syudad kung asa didto sugaton ang boksidor alang sa ipahigayon nga short motorcade libot sa syudad, dayon molahos sa buhatan ni Gensan City Mayor Lorelie Pacquiao isip kabahin sa pagahimuon nga heroes welcome sa IBO Champion.
Kahibaloan nga kauban usab ni Dave Apolinario nga moabot sa Gensan ang Sanman boxing Promoter nga si Jessie Manangquil. Kahinumduman nga nakuha ni Dave ang IBO title kung asa gikalipay sa nasud gumikan sa subling pagsakmit sa Pinoy og World boxing title. Si Apolinario sa pagkakarun, adunay limpyo nga record kung 17 ka daog, wala pay pildi ug dose ka knockouts.
