GENERAL SANTOS CITY – Padayon nga ginamonitor sa kapulisan sa Lagao sa usa ka piniriso nila nga suspected covid patient kauban ang uban pang mga binilanggo.
Matud kang PMajor Yol Hilado, hepe sa maong estasyon nga naka-isolate na ang usa ka piniriso human nga nakasinati og pag-ubo og naglisod usab matud pa sa pagginhawa sa miaging gabie.
Gibutyag sa opisyal nga ilaha nang gikordon ang kilid nga bahin sa police station aron masigurong walay makasulod sa isolation area sa maong piniriso.
Sa pamahayag ni Hilado, dihang nagreklamo ang usa ka piniriso sa dili maayong gipamati, gilayon nila kining gidala sa Dr. Jorge Royeca Hospital og gipahigayon sa nasampit ang minor medical intervention.
Hinuon ugma pa Lunes ipailawom ang nasampit sa pagsusi aron makumpirma kung natakbuyan sa covid 19.
Kini tungod walay operasyon sa covid 19 test sa RHU Lagao sa adlaw nga Sabado og Domingo.
Sa pamahayag ni Hilado nga matag adlaw ginapahigayon ang temperataure check-up sa tanan nilang piniriso og sumala pa stable ang kondisyon sa mga nasampit.
Sa bahin sa usa ka piniriso nga suspected covid patient, wala daan magsulti ang nasampit nga may kasaysayan sa tuberculosis.
