GENERAL SANTOS CITY – Nagpahinumdum ang Securities and Exchange Commission (SEC) batok sa bag-ong scam nga gapahigayon og operasyon sa GenSan og sa ubang mga lugar sa Mindanao.
Sa pahimangno sa Enforcement and Investment Protection Department sa SEC, nakadawat sila og impormasyon kalabutan sa grupo sa mga indibidwal nga gaawhag sa publiko nga mag-invest og kwarta sa MER’s BUSINESS CENTER nga gipangunahan nilang Reynaldo Abing Camingawan og Roger Abing Camingawan.
Ang MER’s BUSINESS CENTER ang gatanyag og investment scheme sa publiko pinaagi sa “Contractual Joint Venture Agreement” kung asa ang mga myembro o business partners ang gipasaligan nga makadawat ug 30% nga monthly interest o 360% sulod sa dose ka bulan og renewable sulod sa usa ka tuig human ang expiration niini.
Ang maong investment plans sa MER’s BUSINESS CENTER ang giagi sa Facebook Live posts og videos sa page ni Roger Camingawan og sa “Isumbong mo kay Kapartner Roger Camingawan” lakip sa YouTube Channel nga “Kapartner Mo Channel”.
Nasayran nga si Roger Abing Camingawan ang usa sa mga sakop ni KAPA founder Joel Apolinario.
