GENERAL SANTOS CITY – Wala nahinayon ang pagtambong sa session ni City PNP Director Col. Gilberto Tuzon kagahapong adlawa aron maghatag og pagpaklaro kalabutan sa mga missing nga mga menor de edad sa dakbayan.
Kini human nakadawat ug abiso ang Konseho nga may mahinungdanon nga giadtuan ang maong opisyal.
Una niini nagmugna og tracker team ang General Santos City Police Office kon GSCPO aron magtutok sa mga na-missing nga mga indibidwal dinhi sa dakbayan.
Matud pa ni P/Major. Rizza Hernaez, tigpamaba sa GSCPO nga lakip sa gitutukan sa imbestigasyon kung ang mga nasampit ang nalambigit sa mga natigayong kremin sa syudad.
Gibutyag sa report nga walo ka mga menor de edad ang missing hangtud karon.
Sa pamahayag ni Hernaez nga nakig-alayon na ang kapulisan sa GenSan sa nagkadaiyang mga police station sa kasikbit nga mga lugar sa rehiyon aron magpatabang sa pagpangita sa mga nasampit.
Kahibaluan nga nangayo og tabang ang mga ginikanan sa mga nasampit nga mga menor de edad sa Bombo Radyo GenSan og kang City Councilor Jeng Gacal human nga wala nakauli ang ilang anak sulod na sa pipila ka mga semana.
