GENERAL SANTOS CITY – Ginahimong prontalya ni Jerson Hechanova, 41 anyos nga residente sa Block 4, Brgy. City Heights ning syudad ang pagpamaligya ug mga tanum sa pagpamaligya usab niini og ginadiling droga.
Kini ang nahimong pagkumpirma ni Kath Abad, ang tigpamaba sa PDEA 12 may kalabotan sa pagkadakop kang Hechanova nga una nang gipatala sa iyang pamilya nga nawala kaniadtong Abril 13,2021, .
Matud ni Abad nga dugay nang namonitor sa taga PDEA ang modus sa suspek kung asa gabaligya og ginadiling droga pinaagi sa social media .
Makig-meet up ang suspek sa buyer o customer niini aron ihatag ang iligal nga droga apan ang item ang ginasuksok sa tanum human nga nagpakaaron-ingnon kining gabaligya ug mga bulak.
Giklaro ni Abad nga lihitimo ang operasyon nga nagresulta sa pagkasikop sa suspek human kini makuhaan og duha ka sachet sa shabu.
Dugang pa niini nga usa ka targetlisted si Hechanova.
Samtang sa pakighinabi usab sa Bombo Radyo, gibutyag ni GSCPO chief P/Col. Gilberto Tuzon nga iyaha nang gimanduan ang mga concerned police station commanders nga tutukan ang mga natala nga sumbong kalabot sa mga missing persons.
Matud niini, padayon ang ginahimong background checking sa kapulisan, partikular ang mga grupo nga posibleng gikalambigitan sa mga nasampit.
Base sa iyang Facebook page, giasoy ni City Councilor Atty. Franklin Gacal, ang Committee Chair sa Peace and Order sa konseho ning dakbayan nga dul-an na sa 10 ka mga menor de edad ang gikataho nga “missing” o wala na maka-uli sa ilahang mga pamilya, karong bulan lamang sa Abril.
Kini human nga midangop kaniya ang mga ginikanan sa unom niini aron magpatabang nga makit-an ang ilahang kabataan, diin nagpangedaron og 14 hangtud 18 anyos pa lamang.
