GENERAL SANTOS CITY – Gikasuhan na sa National Bureau of Investigation Sarangani District Office ang usa ka lalake nga nanghulga sa kanhi hinigugma nga ipakita ngadto sa mga kaila ug mga paryente ang tanang hulagway nila nga walay mga sapot kung mubalibad nga makigkita og makighilawas kaniya.
Giila ang suspek nga si Rusman Haji Brahim, 33 anyos nga taga Sarangani Province. Gikabutyag nga tulo ka tuig nga nagkarelasyon ang suspek og reklamante nga giila lamang nga si Alias Barbie, 23 anyos nga taga South Cotabato apan nagkabulag kaniadtong Decemeber 2020.
Dili matud pa maka-move-on ang suspek sa pagbulag nila sa iyang hinigugma og didto nagsugod nga nanghulga sa babaye.
Hinungdan niini, nagpatabang sa NBI-SARDO ang babaye aron maundang na ang pagpangbahad kaniya tungod gustong makigkita sa suspek sa usa ka lodge aron sila maghilawas.
Tungod niini, gipahigayon sa sakop sa NBI SARDO ang entrapment operation sa usa ka lodge dinhi sa dakbayan kung diin nanulod ang suspek ug ang biktima sa room number 5.
Hilabihan ang kahikurat sa suspek dihang gisulod sa mga ahente sa NBI ug giposasan ang duha ka mga kamot samtang wala nay sul-ob nga pantalon og sinena pang-taas og naka-brief na lang.
Sa karon nagpabiling nagpakahilom ang maong sextortionist kalabot sa salaud niining nahimo sa kanhing hinigugma samtang anaa nabalhog sa selda sa NBI-SARDO.
