GENERAL SANTOS CITY – Gilauman nga magausmite og report si Geraldine Zamora, labaw sa City Permits and Licensing Divison kang Gensan City Mayor Ronnel Rivera aron masayran kung unsa ang posibleng himuon o ipatuman nga sanction ngadto sa mga imnanan nga nakumpirma nga wala misunod sa mga minimum health protocol kontra sa COVID 19.
Kini human nga nagsugod na sa paglibot ang nasangpit nga buhatan sa mga establishemento sa syudad apil ang mga imnanan nga wala pa nakapa-renew ug business permit.
Sumala kang Zamora, ilahang gi-una ang mga bar human makadawat ug mga reklamo.
Tumong sa maong inspeksyon nga malikayan ang padayong pagsaka sa kaso sa COVID-19 sa dakbayan.
Subay sa insiyal nilang pagsuta, sagad sa mga bayolasyon mao ang pagsupak sa physical distancing.
Samtang adunay mga kan-anan nga ginatugutan ang mga batang 15 anyos paubos nga makasulod.
Dugang pamahayag ni Zamora nga adunay mga establishemento nga nagapatuman sa No QR Code, No Entry, No Facemask, No Faceshield No Entry, apan pagsulod na, dili na mapatuman ang physical distancing.
Saysay niya nga adunay mga bar kung asa sagad sa mga kustumer ang naga-share ug baso nga usa sa mga gina-dili tungod usa kini sa mga posibleng hinungdan sa pagkatag sa COVID-19
