GENERAL SANTOS CITY- Nakontrola na matud pa ang nahitabong Diarrhea Outbreak sa Barangay Butuan, Jose Abad Santos, Davao Occidental, kini ang gikumpirma ni Mayor Jason John Joyce.
Sa pakighinabi kaniya sa Bombo Radyo GenSan, gibutyag niini nga sa karoan padayong gi-atiman sa mga doctors ug nurses ang 33 ka mga pasyente human naigo sa kalibanga.
Sumala pa ni Mayor Joyce nga sa ilang pagsubay nasuta nga kaniadtong Dec.31,2020 nagsugod matud pa ang pagpanakit sa tiyan sa mga pasyente kung asa dunay usa ang nakabsan sa kinabuhi nga usa ka senior citizen.
Ang maong senior Citizen ang nailhan nga usa ka Emilio Sumanday. Sa pamahayag pa sa nasampit nga mayor nga usa sa gituohan nilang hinungdan ang tinubdan sa tubig nga ginainum sa mga tawo nga gikan sa deep well kung asa naka-konekta gihapon ang ilang mga gripo.
Dugang saysay ni Mayor Joyce nga walay angay kabalak-an ang mga pasyente tungod libre ang tambal nga ihatag kanila sa ospital isip paghatag ug tinud-anay nga serbisyo sa katawhan.
Sa karon, giawhag ang tanang katawhan sa maong lugar nga mas maayong pabukalan usa ang tubig nga ilang imnon aron masiguro nga hinlo kini ug malikay sa sakit.
