GENERAL SANTOS CITY -Siyam ang natala nga shooting incident dinhi sa dakbayan sa bulan sa Disyembre subay sa rekord sa General Santos City Police Office (GSCPO).
Kini ang gibutyag ni P/Major Jaime Chavez ang hepe sa City Investigaton and Detective Management Unit dihang gipatawag sa special session nga gipahigayon sa Sangguniang Panlungsod og nagpaklaro sa status sa mga insidente sa pagpamusil sa dakbayan.
Gibutyag niini nga duha ang napasang-at na sa Prosecutors Office og ang pagpusil patay sa Barangay Kapitan sa Glan Padido nga si Isedrito Cañete ang gilayong ipasang-at sa piskalya kung mahuptan ang death certificate sa biktima.
Matud niini, ang ubang shooting incident ang giimbestigahan pa samtang padayon ang pagpangita og dugang ebidensya og testigo.
Gibutyag ni Major Chavez nga mas ubos gihapon ang pagpamusil nga natala sugod Oktobre hangtud Disyembre ning tuiga nga 13 ka buok itandi sa susamang panahon kaniadtong 2019 nga mukabat sa 23.
Gihimo sa GSCPO ang tanan aron mabantayan ang publiko og mapabilin ang kahapsay og kalinaw luyo sa kakulang sa mga sakop.
Aminado si Chavez nga dili tanan ang makaya sa kapulisan og kinahanglan ang panabang sa mga katawhan.
Atol sa sesyon, gisukit-sukit ni City Councilor Rosalita Nuñez si Major Chavez kalabot sa deployment plan sa GSCPO sa mga ginsakpan.
