GENERAL SANTOS CITY – Giimbestigahan karon sa kapulisan kung asa gakuha og iligal nga droga ang magtiayon nga nadakpan sa drug bust operation sa Mabuhay Road ning syudad.
Giila ang mga suspetsado nga silang Emelio Tucmo, 31, minyo og Janilyn Tucmo, 31, susamang residente sa Olarte Labangal ning dakbayan.
Nasayran nga gilusad ang operasyon sa mga personahe sa San Isidro Police Station kauban ang ginsakpan sa Philippine Drug Enforcement Agency (PDEA) 12 atubangan sa usa ka convention center.
Positibong napalitan ang mga suspek nga pulos fish vendor sa usa ka sachet sa gituohang shabu.
Dihang natunol sa duha ang droga bugti sa P500 nga gibayad sa poseur buyer nga usa ka pulis, didto na kini gipangposasan og dayon gidala sa presinto.
Nakuha usab sa posisyon ang mga nasampit og lain pang lima ka sachet sa shabu og usa ka medium size sa pakete sa shabu.
Narekober usab sa kapulisan ang motorsiklo nga gisakyan sa mga dinakpan.
