GENERAL SANTOS CITY – Naalarma na si Gensan Mayor Ronnel Rivera sa sunod-sunod nga pagpang salvage nga nahitabo nga gikalambigitan sa pipila ka residente gikan sa dakbayan.
Kini human nakaabut sa Mayor nga pipila ka residente sa dakbayan ang mawala ug makita na lamang nga patay na ug gilabay sa Polomolok, Tupi South Cotabato ug Malungon ug Maasim sa Saragani Province nga may gipataban nga paskin nga carnaper , esnatser ug drug user .
Matud sa Mayor nga angayan nga mahatagan sa hustisya ang maong mga indibidwal nga brutal nga gipatay. Matud sa Mayor nga angayan maimbestigahan kung kinsa ang mga responsable nga midagit ug mipatay sa mga biktima nga may hiniktan nga alambre ug packaging tape.
Hinuon nasayran sa Mayor nga kasagaran sa mga niini pulos adunay mga record sa kapulisan sa siyudad.
Gipanawagan usab sa Mayor kadtong mga kabanay nga makig-alayon sa mga otoridad aron makapasaka ug kaso batuk sa mga responsable aron mahunong na ang maong pagpangdagit.
