GENERAL SANTOS CITY- Gipangita na sa kapulisan ang mga suspek sa mipusil ug midunggab sa duha ka biktima kaganihang kaadlawon sa Explore Bar ning syudad.
Giila ang mga biktima nga silang Jay Napalit, 22 anyos, tricycle driver ug residente sa Purok 4B Rajah Muda, Bula ug John Vincent Lopez, 21 anyos nga taga Purok Guadalupe Barangay Conel.
Matud pa ni alyas Janjan, higala sa usa sa biktimga nga nagkalalisay ang iyang higala sulod sa bar ug wala mailhing suspek ug nakit-an nga nagbinunalay na ug botelya ug sa dihang migawas nahagba na ang mga nahisgutan.
Nasayran nga si Napalit ang makahiagom ug samad-pinusilan nga resulta sa iyang kamatayon samtang si Lopez ang nadunggaban sa dughan nga bahin kon diin gidala pa sa Socsargen Hospital apan gideklarang dead on arrival.
Padayon pang giimbestigahan sa Lagao Police Station ang naasoyng panghitabo.
Kahibaluan nga daghan ng insidente sa pagpamusil ug kagubot sa Explore Bar kon asa gipasirado na usab kini sa LGU apan subling nag-abli.
