GENERAL SANTOS CITY – Karong adlawa gikatakdang manumpa ang mga bag-ong tuboy nga opisyal sa dakbayan kauban ang mga bag-ong miyembro sa 19th City Council.
Matigayon ang oath-taking alas-2:00 sa hapon sa Lagao Gym ning siyudad. Manumpa si Mayor Ronnel Rivera ug Vice Mayor-elect Loreto Acharon, kinsa manghod ni kanhi mayor ug outgoing South Cotabato First District Rep. Pedro Acharon Jr.
Samtang ang mga manumpa nga bag-ong set sa city councilors mao silang Jose Orlando Acharon, Rosalita Nuñez, Lourdes Casabuena, Jose Edmar Yumang, Brix Tan, Franklin Gacal Jr., Shandee Llido-Pestanio, Jonathan Blando, Vandyke Congson, Vivencio Dinopol, Richard Atendido ug Atty. Dominador Lagare Jr.
Kahinumduman nga nanamilit na sa kanhing mga kaubanan sa Sangguniang Panglungsod sa labing ulahing sesyon sa 18th Council kaniadtong Martes si outgoing Vice Mayor Shirlyn Bañas-Nograles, samtang mitambong usab kaniadtong tungura si incoming Vice Mayor Acharon.
Ug gani, giila ni Acharon ang nahimong performance ni Nograles ug gibutyag nga excellent kini, hinungdan nga angayang magsugod siya sa unang ang-ang ug maningkamot nga matupngan kon dili malabwan ang performance sa iyang gipulihan.
Gihingusgan pa ni Atty Acharon nga ang pagserbisyo ang dili trabaho lang sa mayor, vice mayor, ug city councilors inay sa tanang katawhan.
Samtang, karong adlawa usab matigayon ang oath-taking sa mga opisyal sa probinsya sa Sarangani.
Gikatakdang manumpa alas-3:00 sa hapon sa Sarangani Capitol silang Gov. Steve Chongbian Solon ug Vice Governor Elmer de Peralta, lakip ang mga incumbent board member sa Sangguniang Panlalawigan sa Sarangani nga silang George Falgui, Arman Guili, Jess Bascuña, Benjamin Donato, Rheymar Dian, Rosemarie Sayo, Joseph Calanao, Eduardo Paras, Sr., apil ang mga newly-elected board members nga sila si Russel Jamora, Irish Louie Arnado-Benola, Ephraim Galzote, Corazon Grafilo ug Dr. Jose Tranquilino Ruiz.
Kahinumduman nga kaniadtong Martes usab gipahigayon ang adjournment sine die sa SP Session Hall kung asa nanamilit ang mga outgoing nga miyembro sa Sangguniang Panlalawigan sa Sarangani.
