GENERAL SANTOS CITY – Nadala sa Dr. Jorge P. Royeca Hospital ang unom ka mga tawo human sa banggaanay sa duha ka tricycle nga nahitabo sa may traffic lights sa Makar, Barangay Labangal ning dakbayan.
Giila ang mga biktima nga silang Daisy Jean Baternal, taga-Zone 1 Bula; Mary Ann Capin, taga-Prk. 2 Calumpang; Roselyn Lozara, taga-Greenville, Calumpang; Mary Grace Velasco, taga-Bulaong Extension, Labangal; Angelie Nicole Rumares taga- Labangal; ug Mac Dela Cruz, taga-Calumpang ning dakbayan.
Nahitabo matud pa ang naasoy’ng aksidente sa dalan samtang padulong sa downtown ang mga biktima.
Wala matud pa miandar kaniadtong tungura ang traffic lights sa lugar hinungdan nga midiretso lang ang tricycle nga gisakyan sa mga biktima sa crossing.
Wala nabantayan sa ilang driver ang laing tricycle nga padulong hinungdan nga nagbanggaanay.
Pulos nakaangkon ang mga biktima ug mga pangos hinungdan nga gidala sa naasoy’ng tambalanan, samtang nagpadayon ang imbestigasyon sa Traffic Management Unit sa naasoy’ng insidente.
