GENERAL SANTOS CITY – Walay nagpositibu sa ginadili nga druga sa 115 ka mga public utility drivers nga gipailawom sa surprisa nga drug test nga kabahin sa OPLAN HARABAS: ‘Drug Test Muna Bago Pasada’ nga gipatuman sa Philippine Drug Enforcement Agency kagahapong adlawa dinhi sa dakbayan.
Mismong si Director Naravy Duquiatan maoy nanguna sa aktibidad sa pagkuha ug mga urine sample sa mga driver .
Kuyog sa PDEA ang taga Land Transportation Office sa pagpanguna ni Dir. Macario Gonzaga, Land Transportation Franchising and Regulatory Board sa pagpanguna retired Col. Paterno Reynato Padua, Civil Aviation Authority of the Philippines pinaagi ni General Manager Eduardo Cueto, Regional Mobile Force Battalion , General Santos City Police Office ug Joint Task Force Gensan Barracuda sa pagpanguna ni Col. Eduardo Gubat .
Tulo ka mga lugar ang gipahigayunan sa Oplan Harabas kung asa target ang mga van driver nga adunay biyahe sa Palembang Sultan Kudarat. Samtang mukabat usab sa 62 ka mga van ug traysikel driver ang mihatag sa ilang specimen samtang laing 53 ka mga taxi driver nga nahimutang sa General Santos City Airport ang napailawom usab sa drug test.
Kabahin sa Oplan Harabas ang pagpanghatag ug PDEA Comics sa mga drivers ug passengers sa gipangbisitahan nga lugar. Ang mga nakuha nga specimen ang gilayon nga gisumite sa PDEA 12 Regional Laboratory ug base sa resulta walay nagpositibu sa paggamitan sa illegal drugs.
