GENERAL SANTOS CITY – Kumpiyansa si P/Brigadier General Eliseo Tam Rasco nga mga maayo og walay mga pulis sa PNP-12 nga nalambigit sa ‘hulidap’ o pangongotong sa nadakpan sa mga operasyon.
Una niini wala napugngan ni National Capital Region Police Office (NCRPO) chief Police Major Guillermo Eleazar nga mutugpa ang iyang kamot kang Police Corporal Marlo Quibete sa dihang kini iyang kumprontahon human nga mangilkil og P200,000 sa kabanaya sa ilang nadakpang drug suspek.
Sa pakighinabi sa Bombo Radyo GenSan, gibutyag ni B/Gen. Rasco, walay susamang insidente nga natala sa Region 12.
Dugang pa niini, kanunay nga gitambagan ang mga sakop nga himuon ang ilang trabaho nga nahisubay sa balaud og legal nga paagi.
Apan giangkon ni B/Gen. Rasco nga kapin 10 ka dismissal sa mga pulis sa Region 12 ang iyang napirmahan sa kasamtangan kung asa mipailawom pa sa proseso tungod sa katungod usab niini nga muapela.
