GENSAN – Wala pa man miinit ang sampot ni Police Supt. Marvin Dua-Dua isip bag-ong hepe sa Polomolok Municipal Police Station, laing pagpamusil na usab ang nahitabo sa ilang area of responsibility kagahapong adlawa.
Sa pakighinabi sa Bombo Radyo kang Police Supt. Dua-Dua, natigayon matud pa ang pagpamusil alas-3:00 pasado sa hapon, sa Dahlia Street, Poblacion, Polomolok. Giila niini ang biktima nga si Johar Panagas, hamtong ang pangidaron, usa ka tricycle driver nga residente sa Koronadal Proper, Polomolok, South Cotabato.
Sa insiyal nga imbestigasyon, duha matud pa ka lalaki nga naka-bonnet nga sakay sa XRM nga motorsiklo ang responsable sa pagpamusil.
Nakaangkon ang biktima ug tulo ka samad-pinusilan sa ulo nga maoy hinungdan sa iyang kamatayon.
Narekober sa crime scene ang mga basyo sa caliber 45 pistol. Sa karon nanghinaot ang kapulisan nga may CCTV camera sa lugar nga gilaumang makatabang sa imbestigasyon sa maong krimen.
(vc____) Nasayran nga duha na ka kaso sa pagpamusil-patay ang nahitabo sa Polomolok ning sayong bahin sa 2019.
