GENERAL SANTOS CITY – Nagpabilin sa Alert level 3 ang dakbayan sa Heneral Santos.
Kini ang gikumpirma ni Capt. Dave Istoninos sa Joint Task Force kon JTF-GenSan, sa pakighinabi sa Bombo Radyo.
Sumala pa, hugot gihapon ang ilang pagbantay sa seguridad sa siyudad, sa pakigtambayayong sa General Santos City Police Office, hilabi na alayon sa pagsaulog sa Paskuhan sa GenSan.
Bisan paman, nagpabilin matud pang normal ug hapsay ang sitwasyon sa siyudad.
Samtang, nanawagan usab si Capt. Istoninos sa publiko nga suportahan ang programang Preventing and Countering Violent Extremism kon PCVE nga programa sa PNP ug DILG nga tumong nga mapugngan ang pagkatag sa radicalism ug violent extremism nga ginahimo sa mga teroristang ISIS.
Tumong niini aron madugangan ang awareness sa katawhan, ug aron dili sila ma-recruit sa mga ISIS. Ug gani, ginatuyok matud pa nila ang matag barangay sa siyudad alang sa pagpasabot sa naasoy’ng programa.
Sa karon anaa na matud pa sa 15 ka barangay ang ilang natuyok. Kon mahuman na ang mga barangay, plano usab nilang sa mga tulunghaan na usab hilabi na sa mga madrasah schools, alang gihapon sa maong programa.
Dungan niini, gipasalig sa nahisgutang opisyal nga wala pa silay namonitor nga mga teroristang nakasulod sa siyudad, ug hugot matud pa ang ilang pagbantay ug interlligence monitoring aron dili mahitabo ang sa ingon.
